EnglishLao(ລາວ)

Emsp Tools

Data Catalogue

Temperature in Lao PDR

Login Form



Statistics

Members : 23
Content : 211
Web Links : 6
Content View Hits : 331069

Who's Online

We have 51 guests online

Search

w-dscf8591.jpg

Facebook

Joomla Templates and Joomla Extensions by ZooTemplate.Com

jTweeter

Provincial Profile Sekong
Written by Amkha VAYAPHATH   
Thursday, 22 March 2012 13:36

ສະພາບ​ລວມຂອງ​ແຂວງ​ເຊ​ກອງ

ທີ່ຕັ້ງ ແລະ ພູມສັນຖານ

ແຂວງເຊກອງເປັນແຂວງໜຶ່ງ ທີ່ຕັ້ງຢູ່ທາງພາກຕາເວັນອອກສ່ຽງໃຕ້ຂອງສາທາລະນະລັດ ປະຊາທິ ປະໄຕປະຊາຊົນລາວ ຢູ່ເສັ້ນຂະໜານ ທີ 15ŸN ແລະ 16Ÿ 12’N ແລະ ເສັ້ນແວງທີ 106Ÿ 29’E ແລະ 107Ÿ 28’E, ມີຊາຍແດນຕິດກັບແຂວງໃກ້ຄຽງຄື:

-    ທິດເໜືອ ຕິດກັບແຂວງສາລະວັນ ມີຊາຍແດນຮ່ວມກັນ ຍາວ 166 ກມ.

-    ທິດໃຕ້ ຕິດກັບແຂວງອັດຕະປື ມີຊາຍແດນຮ່ວມກັນ ຍາວ 155 ກມ.

-    ທິດຕາເວັນຕົກ ຕິດກັບ ແຂວງຈຳປາສັກ ມີຊາຍແດນຮ່ວມກັນ ຍາວ 57 ກມ.

-    ທິດຕາເວັນອອກ ຕິດກັບ ແຂວງກວາງນາມ, ແຂວງເທືອທຽນເຫວ້ ແລະ ແຂວງກອນຕູມ ຂອງສສ ຫວຽດນາມ ມີຊາຍແດນຮ່ວມກັນຍາວ 280 ກມ.

ແຂວງເຊກອງມີເນື້ອທີ່ທັງໝົດ 7,665 ກມ2 ກວມເອົາ 3.24% ຂອງເນື້ອທີ່ທົ່ວປະເທດ ແລະ ມີສາຍພູຫຼວງເປັນບ່ອນອີງທາງດ້ານພູມສັນຖານ. ພູມສັນຖານຂອງແຂວງເຊກອງ ມີລັກສະນະ ຫລຸບໂນນ ແລະ ຄ້ອຍງ່ຽງ. ທາງດ້ານຕາເວັນອອກ ແລະ ທິດໃຕ້ ລະດັບຄວາມສູງຂອງສາຍພູຫລວງຄ່ອຍໆ ຫລຸດລົງ ແຕ່ດ້ານຕາເວັນອອກຫາດ້ານຕາເວັນຕົກ ແລະ ຄ້ອຍຕຳລົງໄປຫາທົ່ງພຽງເຊກອງ ລຽບໄປຕາມສາຍນ້ຳເຊກອງ ທີ່ໄຫລຕົກໃສ່ແມ່ນ້ຳຂອງ, ບົນພື້ນຖານຄຸນລັກສະນະ ແລະ ຈຸດພິເສດ ທາງພູມສັນຖານ ແຂວງເຊກອງ ຈິ່ງຖືກຈັດແບ່ງເປັນ 3 ເຂດຄື: ເຂດພູດອຍ, ເຂດພູພຽງ ແລະ ເຂດທົ່ງພຽງ ເຊິ່ງແຕ່ລະເຂດຈະມີລັກສະນະຈຸດພິເສດທາງດ້ານຊັບພະຍາກອນທຳມະຊາດ ແລະ ເສດຖະກິດ-ສັງຄົມທີ່ແຕກຕ່າງກັນ.

  • ເຂດພູດອຍ: ມີເນື້ອທີ່ປະມານ 4,982 ກມ2 ກວມເອົາ 65% ຂອງເນື້ອທີ່ທົ່ວແຂວງ ເຊິ່ງກວມເອົາ ເມືອງກະລຶມ ແລະ ເມືອງດາກຈຶງ, ພູມສັນຖານປະກອບມີ ພູສູງເປັນຫລຸບໂນນສະຫລັບສັບຊ້ອນກັນ ເປັນລ້ອງແຄບໆຍາວຢຽດໄປຕາມສາຍນ້ຳ ແລະ ຫ້ວຍຕ່າງໆ ເຂດດັ່ງກ່າວນີ້ເໝາະສົມແກ່ການປູກພືດອຸດສາຫະກຳ​ ແລະ ການລ້ຽງສັດ,
  • ເຂດພູພຽງ: ມີເນື້ອທີ່ປະມານ 2,300 ກມ2 ກວມເອົາ 30% ຂອງເນື້ອທີ່ທົ່ວແຂວງ ເຊິ່ງກວມ ເອົາ ສ່ວນໜຶ່ງຂອງເມືອງລະມາມ ແລະ ເມືອງທ່າແຕງ ພູມສັນຖານປະກອບດ້ວຍສາຍພູຕໍ່າ ແລະ ປານກາງສະຫລັບຊັບຊ້ອນກັບພູພຽງ ມີຄວາມຮາບພຽງດີເໝາະສົມ ແກ່ກການປູກພືດ, ຕົ້ນໄມ້ອຸດສາຫະ ກຳ-ກະສິກຳ ແລະ ການປູກພືດຫລາຍຊະນິດ ໂດຍສະເພາະ ຂອບເຂດດິນ ເມືອງທ່າແຕງ ກວມເອົາເຂດພູພຽງບໍລິເວນ ທີ່ເປັນດິນທີ່ອຸດົມສົມບູນກວ່າໝູ່ ຊຶ່ງໄດ້ຮັບອິດທິພົນຈາກພູເຂົາໄຟ ລະເບີດ ຫຼາຍພັນປີຜ່ານມາ.
  • ເຂດທົ່ງພຽງ: ມີເນື້ອທີ່ປະມານ 383.25 ກມ2 ກວມເອົາ 5% ຂອງເນື້ອທີ່ທົ່ວແຂວງ ເຂດດັ່ງກ່າວ ສ່ວນໃຫຍ່ແມ່ນເຂດເມືອງລະມາມ ແລະ ເປັນພື້ນທີ່ລຽບຕາມລຳນ້ຳເຊກອງ ທີ່ມີຄວາມສາມາດ ເຮັດນາ ໄດ້ຫລາຍທີ່ສຸດ ທຽບກັບເມືອງອື່ນໆຂອງແຂວງ.

ສະພາບ​ອາຄີກາດມີຄວາມແຕກຕ່າງກັນ ຕາມລັກສະນະພູມສັນຖານ ​ໃນ​ໄລຍະ 5 ປີຜ່ານມາ​ 2005-2010 ສາມາດ​ຕີ​ລາຄາ​ສະພາບ​ໄດ້ດັ່ງນີ້:

ເມືອງດາກຈຶງ ແລະ ເມືອງທ່າແຕງ ເປັນເຂດທີ່ມີອາກາດຂ້ອນຂ້າງໜາວຕະຫລອດປີ ອຸນຫະພູມສະເລ່ຍ 22.74 ອົງສາ, ໃນນັ້ນອຸນຫະພູມຕໍ່າສຸດ 6.10-10.0 ອົງສາ ແລະ ອຸນຫະພູມສູງ ສຸດ 29.8-35.0 ອົງສາ, ປະລິມານນ້ຳຝົນສະເລ່ຍ 1,849 ມມ/ປີ.

ເມືອງກະລຶມ ແລະ ເມືອງລະມາມ ອາກາດຮ້ອນ, ອຸນຫະພູມສະເລ່ຍ 26.9 ອົງສາ; ອຸນຫະພູມຕໍ່າສຸດ 8.0-11.0 ອົງສາ, ອຸນຫະພູມສູງສຸດ 38.5-41.5 ອົງສາ; ປະລິມານນ້ຳຝົນສະເລ່ຍ 1,399 ມມ/ປີ. ແຂວງເຊກອງໄດ້ຮັບຜົນສະທ້ອນ ຈາກລົມມໍລະສຸມທີ່ພັດມາຈາກທະເລຈີນຕອນໃຕ້ເຊິ່ງເຮັດໃຫ້ມີສອງລະດູຢ່າງຈະແຈ້ງຄື: ລະດູຝົນແຕ່ເດືອນທ້າຍ​ເດືອນ 5 ຫາ ​ທ້າຍເດືອນ 10; ລະດູແລ້ງ ແຕ່ເດືອນ 11 ຫາ ​ເດືອນ 4. ​ໃນ​ຮອບ 5 ປີຜ່ານມາ ​ແມ່ນ​ມີ​ອາກາດ​ຮ້ອນ​ອົບ​ເອົ້າ ​ເຮັດ​ໃຫ້ການ​ລະ​ເຫີ​ຍອາຍ​ຈາກ​ທຳ​ມະ​ຊາດ​ແມ່ນ​ມີ​ປະລິມານ ​ເພີ່ມ​ຂຶ້ນ ​ເຊິ່ງວັດ​ແທກ​ໄດ້ 7,417.7 ມມ.[1]

ແຂວງເຊກອງປະກອບມີ 4 ເມືອງຄື: ເມືອງລະມາມ, ເມືອງທ່າແຕງ, ເມືອງດາກຈຶງ ແລະ ເມືອງກະລຶມ; ມີ 230 ບ້ານ, 28 ກຸ່ມ​ບ້ານ, 14,216 ຫລັງຄາ​ເຮືອນ, 16,509 ຄົວ​ເຮືອນ, ມີພົນລະເມືອງທັງໝົດ 101,809 ຄົນ; ຍິງ 51,737 ຄົນ,[2] ກວມອັດຕາສ່ວນ 50.82% ຂອງ​ພົນລະ​ເມືອງ​ທົ່ວ​ແຂວງ, ​ອັດຕາ​ການ​ຂະຫຍາຍຕົວ​ຂອງ​ພົນລະ​ເມືອງ 2.3% ຕໍ່​ປີ, ລະດັບ​ຄວາມ​ໜາ​ແໜ້ນ​ຂອງ​ພົນລະ​ເມືອງປະມານ 13 ຄົນ​/ກມ2 ຫລື 0,43 ຄົນ/ກມ2 ທຽບ​ໃສ່ເນື້ອ​ທີ່ທົ່ວ​ປະ​ເທດ.

ແຂວງ​ເຊ​ກອງ​ປະກອບ​ມີ 10 ຊົນ​ເຜົ່າ​ທີ່​ມີ​ພາສາ​ປາກ​ເວົ້າ ​ແຕກ​ຕ່າງ​ກັນ ເຊັ່ນ: ​ລາວ​ລຸ່ມ, ຕຣຽງ, ແຢະສ໌, ກະ​ຕູ, ຕະ​ໂອ້​ຍ, ຊ່ວຍ, ລະເວນ(ຢຣຸ), ອາລັກ(ຮາລັກ), ​ແງະ(ກຣຽງ), ລະ​ວີ. ​ໃນ​ນັ້ນ​ຊົນ​ເຜົ່າ​ລາວ​ເທິງ​ກວມ​ເອົາ 95% ແລະ ລາວ​ລຸ່ມ​ມີ​ພຽງ 5% ຂອງ​ປະຊາກອນ​ໃນ​ທົ່ວ​ແຂວງ​ເຊ​ກອງ. ຈາກ​ຄວາມ​ຫລາກ​ຫລາຍ​ຂອງ​ຊົນ​ເຜົ່າ ຈິ່ງ​ເປັນ​ເງື່ອນ​ໄຂ​ເຮັດ​ໃຫ້​ແຂວງ​ມີ​ທ່າ​​ແຮງ​ທາງ​ດ້ານ​ການ​ພັດທະນາ​ ການທ່ອງທ່ຽວ​ທາງ​ດ້ານ​ວັດທະນະ​ທຳ. ພ້ອມ​ດຽວ​ກັນ​ນັ້ນ ຍັງ​ມີ​ຊົນ​ເຜົ່າ​ສ່ວນ​ໜ້ອຍ​ທີ່​ດຳລົງ​ຊີວິດ​ເຂດ​ພູດ​ອຍ ມີ​ແນວ​ຄິດ​ເຊື່ອ​ຖື​​ແບບງົມງວາຍ ແລະ ບໍ່​ທັນ​ເຊື່ອມ​ຊຶມ​ ຢ່າງ​ເລິກ​ເຊິ່ງ ຕໍ່​ແນວທາງ​ນະ​ໂຍບາຍ​ຂອງ​ພັກ ​ແລະ ລະບຽບ​ກົດໝາຍ​ຂອງ​ລັດ, ການ​ຕັ້ງ​ຖິ່ນ​ຖານ​ຍັງ​ມີ​ລັກສະນະ​ກະ​ແຈກ​ກະຈາຍ​ຕາມ​ຮ່ອມ​ພູ, ການ​ຜະ​ລິດ​ກະສິກຳ​ ແມ່ນ​ຂື້ນ​ກັບ​ທຳ​ມະ​ຊາດ​ເປັນ​ສ່ວນ​ໃຫຍ່.

 

 


[1] ບົດ​ລາຍ​ງານ​ສະພາບ​ອາກາດ 5 ປີ (2006-2010), ຂະ​ແໜງ​ອຸຕຸນິຍົມ-ອຸ​ທົກ​ກະສາ​ດ 2011

[2] ສັງ​ລວມຂໍ້​ມູນ​ສະຖິຕິ​ພົນລະ​ເມືອງ ສຳລັບ​ກຸ່ມ​ບ້ານ ປະຈຳ​ປີ 2010, ​ພະ​ແນ​ກ​ແຜນການ-ການ​ລົງທຶນ 2010

Joomla Templates and Joomla Extensions by ZooTemplate.Com
Last Updated on Thursday, 17 May 2012 10:41